السلام عليكم ورحمة الله و بركاته

اخواتي الكريمات,,,شهر رمضان ضيف عزيز علينا ياتينا بالبركات والمغفرة و الرحمة لكن نحن لا نحسن استقبال هذا الضيف المبارك ...ما ساقوله الان لا يترتب عالكل لكن فئة معينة

للاسف لا نستمتع ببركات الشهر و البعض يتمنى وكتاه يخلاص رمضان لانو صرف بزاف دراهم بسبب طاولة رمضان ,,لا مانع من تحضير انواع الطعام لان نفس البشر ضعيفة لكن بعقلانية,,,,بالمنطق في نوعية المقادير و كميتها يعني من المعروف اننا جميعا نفقد الشهية بعد الافطار ب 15 دقيقة عالاكثر يعني لن ناكل كثيرا يعني لما نحضرو الفطور ناخذو هذا بعين الاعتبار ..لماذا نكثر الكمية ثم تبقى وتكب في المهملات اعزكم الله ,,

الحكمة من صوم رمضان التحكم بالنفس و الاحساس بجوع الفقراء ,,فلنتق الله

ايضا ندخلو المطبخ على 3 تاع العشية ...من هذاك الوقت للمغرب,,ونكملو نزيدو ننظفو الكوزينة و نطيحو نرقدو من التعب
فلما تضييع الوقت ,,,الزوج و الاولاد لهم حق عالمراة لكن يجب ان تراعي تنظيم وقتها لعبادة ربها ,,اعلم ان خدمة البيت عبادة لكن في حدود تحمل و طاقة النفس و الجسد ,,’’’لا يكلف الله نفسا الا وسعها’’’ والا سوف تحاسبك نفسك عالاجهاد...
نحاولو نقسمو اعمالنا وننظموها..

مثلا نعجنو الخبز تاع يومين كيما الرخساس ,,وحدة نطيبوها والاخرى نخبوها في الثلاجة كرة واجدة في كيس..غدوة ان شاء الله نقرصوها و نطيبوها
هكذا وفرنا تعب الكسرة تاع غدوة,,واذا راجلك يسخف على اشكال الخبز برا فهميه يجيب شوية برك لانها راح تبقى وغدوة يجيب الجديد خير ما يشري بزاف و تبقى ويزيد ماياكلش البايت يروح يزيد يشري ههههههههه

السلاطة خضرا او جزر او بيطراف نحضرو تاع يومين...يعني النهار اللي تعجني فيه ماتوجديش السلاطات باش تنقصي الخدمة

السلاطة خضرا اغسليها وصفيها في الكسكاس و حطيها في طرشونة نظيفة و لميها كي الرزمة واحكمي الرزمة من راسها و انفظيها راح تتقطر السلاطة جيدا من الماء تاعها تماما و تخرجلك ناشفة ..حطيها في صحن في الثلاجة ماتخسرش لانها ناشفة من الماء

الشوربة اذا يوافقلك راجلك و مايتقلشش طيبي تاع يومين وهكا تسخني برك ,,ماشي عيب ناكلو شوربة بايتة ..

البوراك ,,طيبي البطاطا حتى تاع 3 ايام و ارحيها بالفرشيطة و خلطي غير مقدار هذاك النهار برك بالبيضوالباقي خبيها بطاطا وحدها مافيها والو

يبقالك توجدي طاجين العشاء

والمعدنوس و الزيتون حاولي يكونو دايما متوفرين مغسولين مقطعين في علب تاع 3 ايام ,,,اما الزيتون الاسود فيبقى عادي

واخر حاجة في المطبخ

بسينة فيها الرغوة فوق البوطاجي ...الحاجة اللي تخدمي بيها اغسليها وحاولي ماتكثريش الاواني

واواني الفطور يعني الغرافي و الصحون و المغارف والكيسان يكونو في سلة وحدهم واجدين...يجوك ساهلين اثناء تحضير الطاولة

وزجاجة الفينيقرات يعني صلصة السلاطة و علبة او زجاجة الملح وسلة المناديل و الخبز يكونو دوما فوق الطاولة




الفلان و حوايج السهرية انتوما احرار ههههههههه

اما بالنسبة للنقطة الثانية وهي المغفرة والرحمة والتوبة فيجب ان نغير سلوكنا في الشهر الفضيل ,,,التي لا تقرا القران الا قليلا تضاعف مجهودها و تشد العزم واللي تقرا كثيرا تحاول تتدبر و تتامل اياته وتتادرسه

اعداء ديننا الحنيف يتحضرون لشهر رمضان طيلة العام منشغلين بتحضير المسلسلات و البرامج الفنية خصيصا لشهر رمضان وترى الاعلانات و الدعاية لا تتوقف على هذا ..اهكذا نشغل وقتنا في رمضان؟؟؟؟في شهر التوبة والغفران؟؟؟

يعني المراة يومها الكل في المطبخ و بعد الفطور مسلسلات وفوازير وسهرات و خلاص...ماذا سوف يكون رصيدها في اخر الشهر؟؟؟وممكن هذا اخر رمضان نصومه و نموت ..لذلك دعونا نستغل هذه الفرصة الثمينة

ولنعتبرها اخر فرصة ونكثف مجهوداتنا,,,ربما نموت ولا يلحق علينا رمضان العام القادم لنكفر عن سيئاتنا ...والله يوم الحساب عظيم جدا ونحن مسؤولون فلنستعد ونعد لكل سؤالا جواب

خلونا نحس ببركة رمضان كما احسها رسولنا الكريم صلوات ربي عليه و صحابته و التابعين رضوان الله عليهم..نكثر الصلاة والقيام و تلاوة القران و دراسة معانيه و صلة الرحم وفعل الخير و التصدق للمحتاجين و المساكين ..والله لو كل عائلة تفطر عائلة مسكينة مرة في رمضان لتدخل عليها الفرحة في هذا الشهر الفضيل

وخلونا نتابع البرامج الهادفة ونمتنع عن غير الهادفة ,,وبهذا الصدد ادعوكم حبيباتي لمشاهدة برنامج يوم في الجنة للداعية الشيخ محمود المصري ..برنامج اكثر من رائع وهكذا هي حال جميع برامج الشيخ

ايضا برنامج مسلم وافتخر وباقة من البرامج دائما على قناة اقرا روووووووعة

اتمنى رمضان هذا العام يفوت ويخرج خير من العام اللي فات

بارك الله فيكم جميعا

بارك الله فيك ,,,نورتي الصفحة ,,,ان شاء الله كلنا نتغير نحو الاحسن